G-NIGHT - A noite galega. Noite europea dos investigadores. Santiago de Compostela

A Noite Europea dos Investigadores é un evento de divulgación científica que se celebra simultaneamente en cidades de toda Europa o último venres de setembro. Os investigadores son os protagonistas, mostrando a diversidade da ciencia e a tecnoloxía e o seu impacto na vida dos cidadáns. Esta iniciativa organízase no marco do programa H2020 a través das Accións Marie Sklodowska-Curie (MSCA).

Por quinto ano consecutivo, o CiMUS participará nesta xornada, que terá lugar en Santiago de Compostela, con talleres científicos para todos os públicos: 

• "Xogando na cociña con cores" (Molecular Oncology Laboratory, DNA Repair & Genome Integrity Groups)
  Empregando ingredientes que se atopan en calquera cociña, extraeremos con vós ADN de amorodos. 
  Con cultivos “coloreados” de bacterias poderemos ver como manipulando o xenoma somos capaces de modificar algunhas das características dos seres vivos. Pequenos cambios no “código” fan que cambie a súa cor.
• "ADN, cromosomas e divisións celulares" (DNA Repair & Genome Integrity Group)
  Neste obradoiro descubriremos os mecanismos de división celular eucariota utilizando técnicas de microscopía básica e modelos 3D de realidade aumentada. Grazas a estas técnicas poderemos comprender un dos procesos máis relevantes da vida, adaptándoo a todos os públicos.
• "Nanociencia de cores: unha práctica para ver o invisible." (Nanomedicine and Drug Delivery Group)
  Neste taller observaremos a formación de microcápsulas de cores a partir de alxinato de sodio e cloruro de calcio mediante o método coñecido como xelificación ionotrópica. O uso da esferificación está amplamente estendido na industria alimentaria e na medicina; neste último campo tamén se emprega para o encapsulamente de fármacos. 

A Universidade de Santiago de Compostela é unha das entidades organizadoras.

Para máis información, por favor visita GNIGHT-GAL