Alfonso Valencia, referente internacional en bioloxía computacional, fala no CiMUS da USC sobre os desafíos dos xemelgos dixitais en medicina

• O director do departamento de Ciencias da Vida no Centro de Supercomputación de Barcelona e investigador do ICREA (Institución Catalá de Investigación e Estudos Avanzados) impartirá unha conferencia este venres, 23 de xaneiro, ás 13 h, no Theatre room do CiMUS (Avenida de Barcelona, s/n, Santiago de Compostela).

Sobre o desenvolvemento de “copias virtuais” de pacientes para avanzar na medicina personalizada, acelerar e precisar diagnósticos ou previr determinadas enfermidades como o cancro falará o prof. Alfonso Valencia no CiMUS da USC. A conferencia, cofinanciada con fondos FEDER, será este venres, 23 de xaneiro, ás 13 h, no Theatre room do Centro.

O director do departamento de Ciencias da Vida no Centro Nacional de Supercomputación de Barcelona (BSC-CNS) e investigador do ICREA (Institución Catalá de Investigación e Estudos Avanzados) é pioneiro da bioloxía computacional en España e referente internacional neste ámbito.

Na súa conferencia “From genomes to digital twins. Developments and challenges”, aberta a toda a comunidade universitaria, reflexionará sobre os desafíos da Intelixencia Artificial na medicina e sobre como a minería de datos e a aplicación das TIC poden favorecer tratamentos personalizados, máis eficaces e seguros, así como a prevención de determinados tipos de cancro ou de eventuais recaídas.

A construción de modelos dixitais de pacientes grazas a grandes cantidades de datos, á capacidade de cálculo e ao software axeitado permite reproducir con bastante fidelidade enfermidades para a súa mellor abordaxe. “Polo de agora, os modelos que simulan as células son distintos dos que simulan os órganos e dos que simulan o comportamento de todo o organismo. O reto é poder integrar os tres tipos de modelo”, asegura o profesor Valencia.