María José Alonso recibe o premio ASEICA-Muller

• A investigadora principal do grupo Nanomedicine and Drug Delivery do CiMUS foi recoñecida polo seu labor de promoción e mentorización das carreiras de investigadoras en cancro

A profesora María José Alonso, catedrática de Farmacia e Tecnoloxía Farmacéutica da Universidade de Santiago de Compostela (USC) e investigadora principal do grupo Nanomedicine and Drug Delivery do CiMUS, foi galardoada nos Premios ASEICA 2022, que outorga a Asociación Española de Investigación sobre o Cancro (ASEICA), na súa categoría de 'Muller e Ciencia'.

O Premio ASEICA-Muller recoñece a profesionais que se destacan como referentes na visualización, promoción e impulso de mulleres científicas no campo da oncoloxía. Con este recoñecemento, María José Alonso toma a substitución de anteriores premiadas, como as oncólogas Pilar Garrido ou Ana Lluch, de contrastada traxectoria científica e de promoción profesional da muller.

"Desde ASEICA seguimos apostando pola resolución dos problemas de xénero que lamentablemente persisten na nosa área", indicou Luís Paz-Ares, presidente da sociedade científica. "María José Alonso é un referente do perfil de investigadoras forxadas a si mesmas, que chegaron ás cotas máis altas de recoñecemento internacional impulsando no seu camiño ao talento novo, particularmente a mulleres científicas", sinalou Marisol Soengas, vicepresidenta da asociación e responsable de ASEICA-Muller.

Maria José Alonso é pioneira campo da nanomedicina, onde realizou numerosos descubrimentos que a levaron ao 'top ten' en Farmacoloxía e estar na 'The Power List' dos investigadores máis influentes no campo de compostos biofarmacéuticos. Alonso coordinou varios consorcios de investigación financiados pola OMS, a Fundación Gates e a Comisión Europea, participando en numerosos proxectos internacionais. É autora de máis de 300 contribucións científicas con máis de 34.000 citas e inventora de 22 familias de patentes.

A investigadora da USC agradeceu este recoñecemento a ASEICA e indicou que "o meu laboratorio está moi comprometido no desenvolvemento de novas estratexias terapéuticas para combater o cancro, particularmente no ámbito do medicamento personalizado e, sobre todo, porque me sinto moi comprometida co desenvolvemento científico e profesional das mulleres, como así o demostra o feito de que comigo se formaron 30 mulleres doutoras e sempre me rodeei de mulleres en todos os cargos que ocupei".

Xunto á profesora Alonso, nesta edición dos Premios ASEICA 2022 foi tamén galardoada a entidade solidaria +QueUnTrail-Alcoi, na categoría de 'Compromiso Social'.