El CiMUS de la USC abre sus puertas al conjunto de la sociedad en una nueva edición de Ciencia Singular

A Rede de Centros Singulares de Investigación da Universidade de Santiago de Compostela abrirá, un ano máis, as súas portas á cidadanía o sábado 23 de novembro, coa oitava edición de Ciencia Singular. A cita conta con algunhas novidades nesta ocasión; entre elas, a incorporación do CRETUS (Centro de Investigación Interdisciplinaria en Tecnoloxías Ambientais), que se sumou este ano a CiQUS, CiMUS, CiTIUS e IGFAE como membro da rede CIGUS da Xunta de Galicia, que acredita a calidade e impacto da investigación destes centros.

Desde as 10.00 da mañá e ata as 20.00 horas, persoas de todas as idades percorrerán as instalacións dos centros de investigación da USC para coñecer, da man do persoal investigador, o labor científico punteiro que se desenvolve neles día a día. 

Para participar nas actividades é preciso un rexistro previo, que pode formalizarse na páxina web Ciencia Singular desde o próximo martes 19 de novembro ás 16.00 horas. Nesta páxina estarán accesibles os programas e horarios da xornada. Dun xeito ameno e accesible, e a través de charlas divulgativas, visitas guiadas, obradoiros e experimentos, centos de visitantes poderán descubrir a investigación en áreas como a química, as tecnoloxías intelixentes, a medicina molecular, a física ou as ciencias ambientais. Con este programa, Ciencia Singular procura fomentar vocacións científicas desde idades temperás e trasladar á sociedade a relevancia do traballo que se desenvolve nestes centros durante todo o ano.

Solidariedade coas persoas afectadas pola dina en Valencia
Diante da emerxencia xerada pola devastadora dana que afectou a diversas localidades de Valencia, os centros singulares da USC acordaron sumarse á campaña de doazóns impulsada pola Cruz Vermella. As persoas que desexen achegar as súas doazóns poderán facelo a través da páxina web de Ciencia Singular ou no formulario de rexistro.

Consulta aquí o programa do CiMUS

Actividade financiada polo Convenio de Colaboración entre a Consellería de Educación, Ciencia, Universidades e Formación Profesional da Xunta de Galicia e a USC para o desenvolvemento de accións estratéxicas de I+D+i